سنت دادُو دیال صاحب

دادُوصاحب سولہویں صدی میں راجستھان کے مُغل شہنشاہ اکبر کے زمانے میں ایک مسلمان گھرانے میں پیدا ہوئے کامل سنت ہو گزرے ہیں۔ آپ پیشے سے دُھنئے تھے۔ آپ کے نام کے ساتھ ’دیال‘ اِس لیے لگایا گیا کیونکہ آپ سب کے ساتھ ہمدردی سے پیش آتے تھے، اُن کے ساتھ بھی جو آپ کو بُرا بھلا کہتے تھے۔ آپ کی بانی یہ اُپدیش دیتی ہے کہ اِنسانی جامہ نجات کا دروازہ ہے لیکن اِنسان کی انا وِصالِ خدا کی راہ میں دیوار کی طرح حائل ہے۔ آپ سمجھاتے ہیں کہ من کو بھجن سمرن کی مدد سے بس میں لایا جاسکتا ہے۔ اور بھجن سمرن کی باطنی ترکیب یا راز کو صِرف کسی کامل مُرشد سے ہی سیکھا جا سکتا ہے۔ کتاب میں درج ۲۵ تویل شبدوں کا مطالعہ کرنے سے قاری کو احساس ہو تا ہے کہ دُنیاداری میں ضرورت سے زیادہ مبتلا رہنے کی آپ نے کیسے سخت الفاظ میں مذمت کی ہے کیونکہ موت سر پر کھڑی ہے اور وقتِ آخر صِرف پرماتما کا پیار ہی ہمارا مددگار ثابت ہو سکتا ہے۔